三年前佇「巧緣」兮牽引之下，踏入國小教師兮門檻（lam7），從此展開異鄉遊子「根無深，蒂（ti3）無固」兮漂泊生涯；體會著「儂佇高雄教冊，心卻佇台南縣『鹹佫澀』鹽分地帶兮迄種『無根』心情」。

　宋朝尾仔，一代墨蘭宗師鄭所南，是一位剛直耿介兮讀冊儂，宋室滅亡了後，無願意北面服侍「元朝」，隱居江湖，畫蘭自我消遣，別號「憶翁」，另外佫號作「三外醉人」，伊兮蘭花畫作攏是「露根蘭」，無愛畫「土」，有好事者問即個原故，鄭先生講：「土已經被番人奪走，那裡有土石呢！」伊兮畫會使列入去文人「寄興畫」兮一種，但伊兮舉止行動，可歸納為「愛國志士」之流。

　另外親像南宋馬遠作畫，景物集中畫面兮一角，人稱「馬一角」；夏珪作畫，景物集中佇畫面兮半爿（peng5），外號叫做「夏半邊」。兩個儂攏感嘆：宋朝遭逢靖康之變了後，徽、欽兩帝北狩，康王南渡建都臨安，國土失去大半，所以借著畫面空白兮「虛」處，來表達內心兮空虛，無踏實。

　我涂某某無in1兮迄種傲（ngoo7）世偉行，因為我並非「愛國志士」，而是「思鄉情切」，無願意暫別溫暖兮家園，逐日吟唱「想厝兮心情」。二年前我捌（bat4）將內心兮感觸（ciok4），寫落「阮恰愛做海口儂」即首詩：

　每逢寒暑假，朋友見面第一句話：「轉來抑袂？」我每擺攏輕聲細說講：「後一擺！」一學期期待過一學期，為了調動想盡辦法敘獎、研習，內心也自我安慰：「無定著我佮高雄有三年之緣；無定著上蒼向望我唯海口踏入山區，研究探討遮兮風土民情；無定著……。」

　一擺佫一擺提出申調，天公伯也大概歹勢看我跡爾無閒、跡爾虔（khian5）誠，目睭kheh一蕊，光一蕊，互我pass過關。總是佇即擺台南縣上無國小教師缺額，開缺猶是偏遠山區兮情況之下，竟然「不心心」互我調轉來離阮兜家無偌遠兮「南安（oaN1）國小」，消息傳來兮當日中晝，歡喜甲食袂落飯；自此以後，好朋友勁連兄對朋友著宣傳講：「順從也！調轉來台南縣矣，對伊來講是天大地大兮大代誌，in1老母講伊暢共飯食袂落去！」

請問一幅（pak4）「露根兮蘭花」，互畫家用畫筆補落「土」佮「雅石」了後，是唔是有恰水（sui2）？