菜瓜棚仔跤

　阮老母佇厝前兮圳溝邊，開闢一塊菜園仔，原先遮是「放屎地」，雜草叢生，糞掃揕（tim3）甲一四界，有東時會鼻著五種兮臭味。阮老母搬來了後，全副武裝，「披荊斬棘」，清除廢棄物，去石整地，幾日後，一塊清氣溜溜，平坦坦兮菜園仔，浮顯佇目睭前，真佩服老大儂兮工作效率。

　厝邊隔壁兮「阿婆仔」，看著即塊新生地----菜園仔，逐家攏學阮老母，pih手ng，舉鋤頭，家己揣家己兮目標，唔免三工，規排本來臭kaN-kaN兮圳溝邊，脫胎換骨變做青leng-leng兮菜園仔。無唔著論起即塊菜園仔兮地權，確實犯著「侵佔」，但如果唯整體來評估，放佇遐互伊發草製造髒亂，為啥麼無愛互老大儂活動活動筋骨，美化環境，一舉數得，功德無量。

　天貓（ba5）霧光，菜園仔就ku幾何位咧掠「菜蟲」兮阿婆，阮老母講：「菜蟲傷過濟，掠攏掠袂了，管伊！菜蟲食申（cun1）兮，則換咱食。」第一擺收成高）麗菜，葉仔去互葉蟲舔（cog2）甲「慘不忍睹」，傷痕累累，一看道知影是菜蟲兮傑作，但是全家照食不誤，津津有味，因為這是辛苦兮結晶，另外佫安全可靠，全無農藥污染。講夠農藥，互我想起前幾日仔所拄著兮一件小故事：

　有一位大街小巷，沿路叫賣兮菜販仔，唔知安怎，有一工生理有夠bai2，朋友看著即種情形，半滾笑講：「菜賣無了，留咧家己食！」無想著即位菜販仔，攏無思考就應話：「袂使！袂使！轉來厝裡，霧一寡水，保持新鮮度，明仔再佫賣。厝內卜煮兮，阮兜菜園仔有夠濟。」

　唔知各位聽出即位菜販仔兮語病無？菜販仔紲（soa3）落去講：「家己種兮恰保險，唯菜商遐提轉來賣兮無信心。」這正是咱定定咧講兮：「別人兮囡仔死袂了」，上好兮例。

　菜瓜生長兮季節一夠，一座一座兮菜瓜棚佇菜園邊搭起來，無偌久，青翠兮菜瓜葉仔，suan甲規棚仔頂；紲落起，黃色兮「菜瓜花」也唔願寂寞露面迎風，引來袂少兮蜂仔、蝴蝶、匏蟲……。阮老母每日期待「菜瓜成熟時」，嘛分配棚仔頂兮菜瓜仔：即條留互家己食，迄條送互某某人，即幾條帶轉去北門……。

　阮老母菜園仔兮成果，唔是卜營利，也唔是全部留落來家己食，大部分是當做社交禮物送了了，如果會當換一句：「阿婆！汝種兮菜有夠好食，有夠幼，多謝喔！」阮母歡喜喙合袂倚（oa2），直直講：「有物件共家食，看汝愛食啥，家己去挽！」

　有一位台南縣籍兮音樂大師----高深池先生，自從唯北門高中退休了後，連兼幾仔間私立學校兮音樂課程；有一擺拄得高老師下課，我共（ka7）伊講：「高老師！我載汝夠車站坐車！」高老師想攏無想就回答：「退休了後，如果無好好兮策劃退休生涯，規日踮厝內做老爺，表面上是享受、好命，其實是浪費時間，而且身體機能會生鉎（sian1），因此愛佇外口揣一寡空課來做，一方面會當互筋骨運動，另外一方面嘛是安排時間，做寡有意義兮代誌。如果汝卜互我加活幾冬，拜託互我慢慢用行兮，行夠車站坐車。」

　阮母仔兮菜園仔佮高老師兮兼課，佇人生兮價值觀來講，應該是相共（kang7），有「異曲（khiok4）同工」之妙，是運動兮，也是時間兮安排；證嚴法師捌（bat4）講過：「時間對一個有智慧兮來講，親像鑽石赫爾珍貴；但對一個頇（han1）慢無智慧兮人來講，可比一把（pe2）塗沙粉，一點仔價值攏無。」消遣性兮菜園仔規劃經營，是另外一種人兮時間運用，雖然袂有啥麼大成就，但總比「坐the椅，看天pong5」兮無聊人生好濟啊！