唯高職兮教師，專倒來做一位「純純純」兮國民小學老師，生活方式做一八○度兮轉變，有朋友問起：「感受如何？」我兮答案是：「有夠讚！正港兮粉筆生涯，無半點仔灌水。」有一寡今（taN1）唯學校畢業，初初踏入學校教冊兮「新鮮人」，面對活潑、天真、好動、好問兮庄跤囡仔，往往唔知卜安怎處理則好，每一日kha電話，向父母、朋友訴苦：「遮兮囡仔有夠皮，有夠害，我強強擋袂稠！」佇邊兮我，暗笑在心內，一點點兮苦，著忍受袂稠，假使互汝去教私立高中職兮牛頭班學生，無吼（hau2）我道唔相信。

　佇我塊教私立高職兮時，有一工我去朋友in1兜?茶，在座有一位生分（hun7）儂講：「如果我有後生查某囝，一定無愛互伊去讀xx高職」，邊也（ax）一位先生對喙問講：「是啥麼理由？」迄位先生紲（soa3）落去說明：「無講恁攏唔知，迄間學校兮學生仔，有偌bai2就有偌bai2，食煙、跋繳（kaiN2）、交查某、肖拍……等，恁講即種學校敢會使讀？老師攏咧食屎兮款，竟然教出即種兮學生。」當時兮我，歸腹肚「瓦斯」，拳頭拇teN恆（an5）恆（x），準備揣機會，揰（tui5）互伊流鼻孔血。但想著咱是堂堂有水準，有涵養兮老師，袂使參in1一般見識，吸一口氣，心互靜落來，開聲著問迄位批評者：

　「借問一下，學生素質兮好bai2，老師是唔是愛負全部兮責任？照我兮看法，家庭、社會、學校三部份攏有關係，袂使干礁指責老師兮不是，如果我是教育部長，即間學校兮每一位老師攏愛加薪水、表揚。」在座每一位攏掠我金金看，我繼續佫講：「理由誠簡單，因為照即位先生所講兮，xx高職兮學生囡仔赫爾狼（liong5）狽（poe7），食煙、跋繳、交查某、肖拍……，件件皆能，十惡不赦（sia3），學校兮老師甘願犧牲小我，透早七點外，一直夠下晡四點左右，管教遮兮學生，維護地方日時兮安寧。如果唔是安爾，遮全部學生衝出去夠街仔面，一定是烏暗、恐怖兮社會。」每一個儂恬恬恬，誠久無儂出聲，有一位儂客問主儂：「拄則塊講話迄位先生是啥？」我兮朋友講：「伊是恁所講兮迄間高職兮老師。」

　國中、高中兮學生仔，拄仔好拄著「狂風暴雨期」，這是in1卜轉大儂有可能愛經過兮一段過渡期，只要輔導人員、父母、朋友佮社會共同來開導，in1著會當誠緊來適應多變兮社會。國民小學兮學生囡，參in1完全無共（kang7）。

　天真、好動、調皮、活潑、問題濟（ze7）、歹纏（tiN5）……，會使講是國小兒童兮天性，嘛是兒童之所以是兒童兮特性，如果將遮兮特性除掉，安爾遮兮囡仔道無可愛囉！

　前一站（zam7）仔，班上兮小朋友，定定圍佇我兮身軀邊，對著我兮頭毛指指點點，原來發見老師兮白頭毛比以往恰濟，其中有一位想卜扯（khiu2）我兮白頭毛，我無拒絕，「無拒絕著是鼓勵」，每一位小朋友那親像塊掠虱（sat4）母，拚命扯，良心講有小寡疼，但囡仔手兮溫暖，透入去我兮心肝堀（khut4）仔，我樂意佇微微疼兮內面，享受兒童兮天真、可愛，互我兮心佫轉去囡仔時陣兮浪漫無邪心境。

　學生仔共我講：班上有兩位女生肖拍。我馬上夠現場，將即兩個冤甲面紅貢貢兮小朋友，帶來操場草埔坐咧，問因兮原因，反正是一寡小小兮小代誌。老師兮任務是充當「和解者」，化解即場兮爭執（zep4）。我因為穿短褲，互草埔仔頂頭兮草蠓仔叮幾何（oa5）十葩。早起我煞發現，昨日冤家兮小朋友，今旦日竟然手牽手，笑微微，這道是囡仔！

　年歲慢慢增加，也將儂兮天真轉變為成熟，有儂講這就是「成長」。但成長卻將儂參儂兮距離扭（siu2）遠，凡事記佇心裡，凡事斤斤計較，形成貪求、瞋（cin1）恨、愚（gu5）癡（chi）、猜疑、對立等等無可愛兮人性，這也就是社會禍亂兮根源。

　宗教家苦勸咱：「對周圍兮人、事、物，用歡喜兮心去面待。」「將善心好好仔表達，用微笑溫暖世界。」這著是愛咱用歡喜心、善心、微笑，抹平儂參儂中間兮隔膜，回復著兒童兮天真，互一寡無爽快兮爭執，來得緊，去得快，完全攏無留下半點影跡。