茶燒就好

　每一個儂攏知影中國儂好客，招待儂客兮方式，隆重猶佫熱情，莫怪有儂批評孔子公兮「有朋自遠方來，不亦樂乎！」即句話有問題。In1講：多年不見兮朋友，唯（ui3）遠方來揣（coe7）汝，本來是一件誠歡喜兮代誌；但如果一個月來四、五個（次）遠方兮朋友，愛陪in1佚（thit4）陶（tho5），佫著陪in1去餐廳食飯，身為薪水階級兮咱，無食倒，嘛忝（thiam2）死。雖然這是「滾爽笑」兮講法，但也說明中國儂待客之道，無來便罷，如果朋友來訪，一定互對方有賓至如歸兮感受；無?（lim1）便罷，淋，一定愛「不醉不歸」，這就是中國式兮隆重佮熱情。

　台灣海峽開放了後，台灣佮中國大陸會當光明正大來來去去，迄爿兮物件紛紛登陸，食茶儂上合（kah4）意宜興小茶鈷（koo2），樣式濟、俗佫精美，家家戶戶有樣看樣，攏參儂準備茶具。

　朋友來揣坐，茶具搬出來，然後唯電冰箱兮冷凍庫，帶（theh8）出珍藏兮「冷凍茶」，煮一壺（oo5）正港兮埔里礦泉水，來一套「高沖低泡」兮茶道絕招，儂客慢慢淋，淋一喙，阿咾一擺，主儂誠意，儂客亦誠有禮數。

　會記得第一擺淋「老儂茶」，太約是二十幾冬前，佇台南縣東山鄉某機關服務兮時。因為盈暗時公務在身，愛去拜訪一寡地方人士。地方人士，那親像攏有咧泡茶，但是in1兮茶鈷、茶杯，烏墨墨，互我第一個感覺是：即個主儂有夠貧（pin5）憚（toaN7），貧憚甲連茶具攏無卜洗；佫看in1每一鈷兮茶葉，太約沖四、五擺著清掉佫換新，每一泡茶，攏是比賽茶，心內佫想：未免傷過浪費。事後則知影：茶具攏有洗，茶垢是刁（tiau1）工留落來兮，講安爾泡出來兮茶水恰有味；定定換茶葉，代表誠心佮誠意。

　一般儂攏相信「文章、風水、茶，真捌（bat4）兮無幾個」即句話。所以當咱咧招待朋友淋茶兮時陣，一定愛捌「泡茶心理學」，泡茶進前，首先突破對方心理障礙。先來一句：「老兄！汝誠有福氣，拄（tu2）則（ziah4）買一斤上等兮好茶，汝著來，淋看覓（mai7）咧，互汝臆（ioh4）看這一斤愛幾圓（iN5）？」儂客淋林了後，價錢一定臆誠懸，其實卡有影是上等茶？一斤才三百箍爾（nia7）爾（x）。如果泡茶進前，白賊學無著，心直口快就講老實話：「這是前工遊覽買兮茶葉，誠俗，一斤三百，我?著袂bai，汝試看覓！」儂客包講：「我著知影！一分錢一分貨，茶水澀，喉韻差！」唔知這敢是心理因素塊作怪。以上所講兮種種，是針對一般兮?茶者，真正研究茶道者，不在此限。

　朋友無棄嫌來阮「耕石樓」開講，泡茶待客是必然兮手續，但阮遮兮口號是：「茶燒著好」、「知已無嫌茶水薄」。因為耕石樓「供應茶水」，只是手續而已，開講是橋樑（nioo5），上重要是破心腹來交往，有話直講，絕無攲（khi）攲（x）蹺（khiau1）蹺（x），規喙攏是無營養兮應酬話；若是安爾，儂客袂歹勢，我嘛感覺浪費生命。另外我嘛上驚中晝頓請儂客食泡麵，結果即位朋友佇外口替我宣傳：「我去某某儂in1兜，主儂誠意請阮食西餐，夠涂老師in1兜上害，只泡一碗統一麵而已。」