《涂順從台語散文集》小檔案 阮恰愛做海口儂 粉筆生涯 茶燒就好 菜瓜棚仔跤 〉鹹魚出頭天


鹹魚出頭天

 大約是民國四、五年代兮款!當年電視機抑未發明,收音機也誠少。熱天兮暗時,只要外口面唔是蓋冷,阮兮序大儂,定定佇食暗頓了後,夯椅條去門口埕納涼,順紲等厝邊頭尾仔過來「kha虎卵」,阮遮兮囡仔,提(theh8)椅頭仔,圍佇in1兮四周圍,聽in1「展膨風,唱望春風」。耳空誠認真聽,唔拘阮兮目睭,四結四結向離阮遐大約三十公尺兮廟埕金金仔相,盈暗是唔是有走江湖賣糊藥兮「走街仔」,來阮遮做一場免費兮「康樂晚會」。

 遮兮走江湖兮,太約分做「文場」佮「武場」兩種。武場完全表現中國功夫:刀、槍、劍術兮表演,練拳頭、倒釘床、刀槍不入兮硬功夫,有儂講這是「賣肉趁錢」;文場有:落地掃、車鼓弄、桃花過渡、七嚮仔、牛犁仔…等民間小戲。唔管文場抑(iah4)是武場,攏是農業社會老百姓暗時仔兮娛樂節目。

 文明兮進步,科技兮發達,佇即個時陣電視機也來出現,節目製作新穎佫嚴格,品質提昇。咱儂,唯門口埕兮「kha虎卵」,倒轉去電視機兮頭前坐規排。庄跤鄉土性兮民間小戲袂食市,走江湖兮戲班仔,一擔一擔收收起來,唔驚死想卜繼績支持落去兮,就愛改變表演型態,掠咱儂兮心理弱點。

 前幾日仔,經過本縣一個袂細兮「牛墟」,內面有百百種兮擔仔,我好奇停車入場參觀。實在有夠久無看過即種場面,in1參一般「夜市仔」無共款兮所在:「賣藥兮」所佔比例誠懸。In1賣藥有一個共同經營模式:一部「小發財」,載一台至兩台兮電視機,一台播送「吳樂天講古」,聲音撰(zoan7)互大大大;另外一台電視,煞咧做「兒童不宜觀賞」兮電影。佫卡心適兮是,有少部分賣藥兮,請一、兩個小姑娘仔,穿一領親像睏衫兮外套,徛佇電視機兮邊也,內行儂一看道知影:「機關囥(khng3)佇倉庫」,如果無臆(ioh4)唔著,應該是賣一罐藥仔,攏無表情兮姑娘仔,就將外套掀兩、三下,「分您看,分我看,逐家攏總看」。佇邊也)咧看兮儂袂少,攏是一寡恰有歲兮老大儂。

請問諸位大爺:這敢算是社會兮病態?抑是汝卜講:「過渡時期嘛!本來就是安爾!」

 看著即種情景,我誠懷念三、四十年代,佇庄跤曝粟場,抑是咱遐大廟埕咧演出兮「走街仔」,in1誠可愛,in1兮演出確確實實是正統兮「農村組曲」,所唱、所跳,攏是咱祖先兮智慧結晶。每首歌曲,攏反映先民一段段燦爛婉約兮戲劇人生,可能是生活兮,也可能是男女之間糖甘蜜甜兮愛情故事,抑可能是風流才子淪落江湖,然後佫「出頭天」兮軼(ek8)聞瑣(so2)事,故事發展兮情節,佮咱兮人生息息相關,是鄉土性兮。

 德國作曲家舒曼捌(bat4)講過下面即句話:「去注意一切兮民歌!in1優美兮旋律,互汝愈會當暸解無共民族兮特性。」台灣古早兮「農村組曲」,佇功利主義兮損(sng2)蕩(tng7)之下,強強卜互儂疏忽、銷聲。現此時咱當咧提倡本土性、鄉土性,若安爾;蘊(un3)含濃(long5)厚(hio7)民族性,佮純樸鄉土氣味兮「農村組曲」,是唔是愛互in1翻身,吐大氣,而且佫大聲喝:「想袂夠今旦日鹹魚嘛會出頭天!」